Qrafik dizayn nədir, nə üçün lazımdır və hansı alətləri istifadə edir? Bu yolda tipoqrafika, illustrasiya və qrafik obyektləri necə və hansı prinsiplərlə istifadə edirik? Bütün bu və digər mövzular ətraflı şəkildə ilk bölmədə keçirilir.
Çoxsəhifəli çap və rəqəmsal dizayn materiallarının növləri, fərqli və oxşar tərəfləri, onların Adobe Indesign-da hazırlanma qaydaları məhz bu hissədə öyrədilir. Indesign-da kataloq, informativ broşur, jurnal üçün üz qabığı hazırlamaqla tələbələr qısa zamanda çap üçün materialların hazırlanma mərhələlərini, onların çapa hazırlanmasını öyrənmiş olurlar.
Adobe Illustrator-un qrafik dizaynerin iş həyatında yeri nədən ibarətdir? Bu proqram vasitəsilə biz hansı problemləri həll edirik? Vektor qrafikası nədir və nə üçün qrafik dizaynerlər bir çox hallarda işlərini vektor formatda hazırlayırlar? Hansı tip işlər vektor qrafikasında və Adobe Illustrator-da hazırlanmalıdır? Rəng nəzəriyyəsi, tipoqrafika, loqo dizaynı, brendinq, vektor formatlı qablaşdırma dizaynı bu bölməni əhatə edir.
Vektor qrafikası ilə bitmap (rastr) qrafikasının fərqi. Birinin digərindən üstün və çatışmayan cəhətləri, Adobe Photoshop-un texniki imkanları və onun dizaynerin iş həyatında rolu məhz bu bölmədə ələ alınacaq. Tələbələr fotoların rəng korreksiyasını, foto-retuş, foto-manipulyasiya, poster və reklam materiallarının hazırlanmasını, işıq və kölgə nəzəriyyəsini bol praktik çalışmalar ilə gücləndirəcəklər.
Veb dizaynın son 20 ildə keçdiyi inkişaf yolları, bu zaman dilimində qarşımıza çıxan texnoloji yeniliklər və dizayn trendləri analiz edilir, dizaynerin hansı bilik və bacarıqlara yiyələnməli olduğu göstərilir. Bu məqsədlə istifadə edilən proqramlar, onların fərqli və oxşar tərəfləri göstərilir.
UX/UI dizayn son zamanlar çox sürətli populyarlıq qazanıb və durmadan genişlənən auditoriyanı əhatə edir. Bu terminin tərkib hissələri, istifadəçi təcrübəsi (UX – User Experience) və istifadəçi interfeysi (UI – User Interface) haqqında təqdimatlar, nəzəri və praktik biliklər tələbələrə çatdırılır. Müəyyən UX problemləri və onların həlli yolları araşdırılır. Bundan sonra isə tələbələr istifadəçi interfeysinin qrafik tərtibatını hazırlayırlar.
Müasir internet istifadəçisi saytlara getdikcə daha çox smartfonlardan daxil olur. Bunun üçün əvvəlki kimi veb saytlar təkcə kompyuter ekranları üçün deyil, eyni zamanda tablet və smartfonlar üçün hazırlanmalıdır. Bu isə nəzəri və praktiki bilik tələb edir. Bu məqsədlə tələbələr veb saytların “responsive” və adaptiv versiyalarının hazırlanma qaydalarını öyrənir, bol praktika ilə qazanılmış bilikləri təkmilləşdirirlər.
Portfoliosu olmayan dizayner, dizayner deyil. Dizaynerin gücü, biliyi və bacarığı hazırladığı portfoliosundan bəlli olur. Dizaynerlər tərəfindən ən çox istifadə olunan Behance və Dribble portfolio platformaları haqqında tələbələrimiz tədris boyunca məlumat alırlar. “Bu platformalarda layihə işlərini necə düzgün hazırlamaq, yerləşdirmək, təqdimat etmək və paylaşmaq olar?” suallarına tam ətraflı cavabı tədris prosesində tələbələr mənimsəmiş olurlar.
UX/UI dizayn üçün bir sıra alternativ proqramlar mövcuddur. Təhsil proqramımızda bu məqsəd üçün Figma tədris edilir. Proqramın interfeysi, alətləri, funksiyaları, prototip hazırlanma prosesi detallı şəkildə öyrədilir. Veb saytlar, onların “responsive” versiyaları bu proqram vasitəsilə tərtib edilir. Tədrisin sonunda isə tələbələr fərqli, modern mobil tətbiqlər hazırlayıb test edir və beləcə bu sahəyə də hazır olurlar.
